मेरा फूल

म फूल फुल्ने बित्तिकै खुसी हुने मान्छेको के पीर?

बसन्त फर्किन्छ हरेक साल!

म जान्दछु,

हरेक बसन्तमा शिशीरको चीसो मिसिन्छ,

पछिल्लो हिउँदले केही न केही खोसेकै हुन्छ,

अलिकति चिथोरेकै हुन्छ

तर अँध्यारा, चीसा दिनहरूमा पनि

यति त ढुक्क छ-

बसन्त आउने नै छ,

फूल फुल्नेछन् फेरि

मैले नहाँसी सुख पाउँदिँन।

त्यसैले म आफ्ना पीरको खासै पीर गर्दिंन

फूल झर्दा रुँदिंन,

ओइलाएका फूलहरूलाई पनि माया गर्छु,

सुकेका फूल मेरा डायरीमा लुकाउँछु,

सजाउँछु —

फूलदानीमा,

स्मृतिका किनारहरूमा,

मेरा प्यारा फूलहरू

मरेर नि बाँच्छन्

सुकेर पनि मगमगाउँछन्,

म भित्र,

शब्दहरूमा,

खालि ठाउँहरूमा

समयको धमिलो छायाँहरूमा।